IK4-TEKNIKERek parte hartuko du MetroAeroSpace biltzarraren bosgarren edizioan
Ikusgarri dagoen zerua oso-osorik aztertzeko gaitasuna edukiko duen instalazio zientifikoa da LSST teleskopioa, eta teleskopio horrek apuntatzeko dituen betekizunak egiaztatzeko irtenbide bat aurkeztuko du zentro teknologikoak biltzarrean.
![](https://www.tekniker.es/media/uploads/noticias/IMG_VerificacionLSST_767x431.jpg)
Ekainaren 20tik 22ra, Metrology for aerospace (MetroAeroSpace) nazioarteko biltzarraren bosgarren edizioa hartuko du Erromak (Italia), eta, bertan, sektore aeroespazialerako neurketa-irtenbide berriekin zerikusia daukaten gaiak jorratuko dira.
Biltzarrean, “Relative pointing error verification of the telescope mount assembly subsystem for the Large Synoptic Survey Telescope” izeneko ponentziarekin hartuko du parte IK4-TEKNIKERek; LSST teleskopioak apuntatzeko duen zehaztasuna neurtzeko irtenbide berri baten garapenari buruzkoa da.
Zentro teknologikoak zehaztasun handiko hainbat neurketa-sistema erabili ditu teleskopioan, baita goi-mailako metrologiarako software-sistemak ere.
Ikusgarri dagoen espazioko askotariko eremuei ahalik eta denbora gutxienean argazkiak ateratzea da teleskopioaren xedea. Horretarako, teleskopioak apuntatzeko duen zehaztasunak ahalik eta handiena izan behar du funtzionamendu-tarte osoan.
MetroAeroSpace biltzarra
Industria aeroespazialerako tresnen eta neurketa-metodoen ikerketari eta garapenari bideratutako biltzarra da MetroAeroSpace.
Hiru egunez, besteak beste, honelako gaiak jorratuko dira bertan: industria aeroespazialean metrologiaren bidez lagundutako ekoizpenerako teknologia, aireontzien osagaien neurketa, industria aeroespazialerako proba eta neurketa elektronikoetarako kalibrazio-metodoak...
Informazio gehiago izateko
Informazio gehiago izateko, sar zaitez MetroAeroSpace biltzarraren webgunera.