Adimen Artifiziala osagai elektronikoen ekoizpenean akatsak detektatzeko

Nola diseina daiteke ekoizpen-lerro batean gertatzen diren akatsak datu-analisiaren bidez detektatzeko eta diagnostikatzeko gai den Adimen Artifizialeko algoritmo bat? Arazo hori konpontzea izan da “Hirutek” taldearen helburu nagusia. Basque Research and Technology Alliance (BRTA) elkarteko kide den Teknikerreko hiru ikertzailek osatzen dute taldea. 

Zentro teknologikoko datu-analitikako hiru adituek Data Challenge irabazi dute PHME 2021 mantentze prediktiboan erreferente den Europako kongresuaren esparruan. Kongresua ekainaren 28tik uztailaren 2ra egingo da, formatu birtualean.

Teknikerreko taldeak osagai elektronikoak probatzen dituen ekoizpen-lerro batean akatsak goiz detektatzeko soluzio bat aurkeztu zuen lehiaketan.

Erabaki-zuhaitzetan oinarritutako diagnostiko-sistema bat eta Kalmanen iragazkian oinarritutako probabilitate-hedapeneko algoritmo bat konbinatzean datza soluzioa. Horrela, akatsak diagnostikatzeko aukera ematen du, eta lan horretarako behar den denbora minimizatzen du. Akatsak azkar detektatuz gero, akats hasiberrien ondoriozko arriskua minimizatzen da.

Soluzio horren arduradunek ikerketaren emaitza txosten batean aurkezteko aukera izango dute izenburu honekin “Divide, Propagate and Conquer: Splitting a Complex Diagnosis Problem for Early Detection of Faults in a Manufacturing Production Line” online kongresuko programaren barruan.

Gainera, Hirutek taldeari Nvidiaren GPU (Graphics Processing Unit) saria eman diote lehiaketan. Horri esker, Teknikerrek bere algoritmoen zenbaketa azkartu ahal izango du etorkizuneko garapenetan.

Zentroko analitika-taldeak lortutako emaitza bikainek erakusten dute gaitasun handia dutela nazioartean posizionatzeko eta ikusgarritasuna lortzeko mantentze-lan prediktiboaren eta makinaren datuen analisiaren esparruan.

Teknikerren beste txosten batzuk

Teknikerrek PHME 2021ean duen parte-hartzean “A Flaxible Data Management System for the Analysis of an ElectroMechanical Actuator on a Test Bench” izeneko hitzaldia ere emango du.

Hitzaldia baliagarria izango da Azure hodeian garatutako informazio-sistema berritzaile bat deskribatzeko, hain zuzen ere hegazkin bateko hegaldi-gainazal primarioak kontrolatzeko diseinatutako eragingailu elektromekanikoaren prototipo batean anomaliak detektatu eta diagnostikatzeko sistema deskribatzeko.

Teknikerren garatutako saiakuntza-banku baten bidez lortutako eragingailuaren eragiketa-informazioa erabiltzen du sistemak. Anomaliak aldagai anitzeko prozesuen kontrol estatistikoaren bidez detektatzen dira, eta diagnostikoa LDA (Linear Separant Analysis) algoritmo baten bidez egiten da.

PHME (Prognostics and Health Management Europe) kongresua PHM kongresuaren Europako bertsioa da, eta erreferentziazko ekitaldia da mantentze-lan prediktiboaren sektorean, hau da, Tekniker espezialista den soluzio teknologikoetako baten sektorean.