Akatsen diagnostikoa eta planifikazioaren optimizazioa, e-mantentze-lanen esparru batean

Kalitate-hobekuntzek, erantzun-denbora gero eta laburragoek eta produktu nahiz zerbitzu industrialen eskarien etengabeko aldaketek gero eta premia handiagoak sortzen dituzte operazioaren eta mantentze-lanen errendimenduan. Gainera, aplikazio-eremu askotan, erabateko optimizazio batera iristeko ibilbide luzea dago oraindik egiteko.

Basque Research and Technology Alliance (BRTA) aliantzako kide den Tekniker zentro teknologikoko Informazio Sistema Adimendunen Unitateko Eduardo Gilabert ikertzaileak «Diagnóstico de fallos y optimización de la planificación en un marco de e-mantenimiento» tesia aurkeztu du, analitika preskriptiboarekin zerikusia daukaten teknikek eta metodologiek industria-arloko mantentze-lanetako aplikazioetan erants dezaketen hobekuntza-ahala erakusteko xedez.

Zehazki, ikerketak hiru teknika ezberdini heltzen die: e-mantentze-lanak eta elkarreragingarritasuna, akatsen diagnostikoa eta estrategien simulazioa eta, hirugarrenik, planifikazioaren optimizazioa.

E-mantentze-lanak, adibidez, tresna teknologikoen sorta erabilgarri bat (sentsoreak, komunikazio-sistemak, biltegiratzeko eta analisiak egiteko metodoak eta abar) integratzea ahalbidetzen duten eta aktiboen eta prozesuen optimizazioan zein sistemen arteko elkarreragingarritasunean etengabe hobetzen jarraitzeko aukera eskaintzen duten elkarlaneko plataforma adimendunak garatzearekin dauka zerikusia funtsean.

Bestalde, akatsen diagnostikoari dagokionez, daturik ez dagoenean edo horiek urriak direnean diagnostiko-sistema on bat egiteko orduan aintzat hartu behar den metodologian eta burutu behar diren ekintzetan zentratzen da tesia.

Azkenik, estrategien simulazioari eta planifikazioaren optimizazioari buruzko atalean, diseinu fidagarriagoen bidez edo mantentze-lanen arloko erabakiak hobetuz mantentze-lanen estrategiak optimizatzea ahalbidetzen duten teknologiei begiratzen die ikerlanak.

«Akatsen diagnostikoa eta planifikazioaren optimizazioa, e-mantentze-lanen esparru batean» tesia Basilio Sierra Araujo UPV/EHUko Konputazio Zientzien eta Adimen Artifizialaren Departamentuko katedradunak eta Aitor Arnaiz Teknikerreko Informazio Sistema Adimendunen Unitateko zuzendariak zuzendu dute.