CIC energiGUNE eta Tekniker, Flow Batteries Europe elkartearen bazkide sortzaileak
13-05-2021
CIC energiGUNE
Joan den apirilaren 28an era ofizialean formalizatutako elkarte horren helburua redox fluxuaren industria bultzatzea da, EBk klimaren eta deskarbonizazioaren inguruan dituen konpromisoak betetzen lagunduko duen balio-kate eraginkorra. garatzeko
CIC energiGUNEk, baterietan, energia termikoko soluzioetan eta hidrogenoan erreferente den euskal ikerketa-zentroak, eta Teknikerrek, Fabrikazio Aurreratuko teknologietan, Azaleren Ingeniaritzan, Produktu Ingeniaritzan eta IKTetan espezializatutako zentro teknologikoak –biak Basque Research & Technology Alliance-BRTAko kideak–, Flow Batteries Europe elkartearen sorreran hartu dute parte. Europako 16 erakundek osatutako elkarteak “Europan deskarbonizazioa bizkortzean, redox fluxu-baterien bidez energia biltegiratzeko soluzioen hedapena areagotuz” egingo du lan.
Flow Batteries Europek hiru helburu ditu: fluxu-baterien teknologiak eta horien balio-katea garatzeko aukerak sortzea, Europako finantzaketa-programetan teknologiaren garapena sustatzea eta negozio-aukerak sortzen laguntzea. Apirilaren 28an egindako sorkuntzako batzarrak 9 eragilek osatutako Batzorde Betearazlea hautatu zuen, besteak beste. Horien artean egongo da Raquel Ferret Negozio Garapeneko zuzendaria CIC energiGUNE ordeztuz. Kargu hauek ere hautatu ziren: presidentea (Volterion, Kees van de Kerk), presidenteordeak (Alexander Schönfeldt, CellCube; Tobias Janoschka, Jena Batteries eta Paul Vollant, Largo Resources) eta diruzaina (Guillaume Chazalet, Kemiwatt).
“Europa azkar lekutu behar da fluxu-baterien esparruan, Asiak eta Ipar Amerikak abantaila handia baitute I+G arloan eta merkataritza jardueran”, adierazi du Raquel Ferret CIC energiGUNEko Negozio Garapeneko zuzendariak. “Aliantza hau martxan jartzeak aukerak aprobetxatzea eta Europa mailan balio-kate eraginkor bat zehaztea ahalbidetuko digu”.
Ildo beretik, Unai Eletxigerra Teknikerreko ikertzaileak ekimen horren garrantzia azpimarratu du eta sorkuntza-taldean BRTAko bi kide egotea nabarmendu du. “Aukera paregabea da teknologia honen aurrean abantailazko posizioa hartzeko”, ziurtatu du.
Flow Batteries Europe bi helburu nagusirekin sortu zen. Batetik, fluxu-baterien teknologien abantailak sustatzea eta Europako hornidura-kateari laguntzea; eta, bestetik, fluxu-baterien balio-katearen garapena eta hedapena bizkortzea eta teknologia zabaltzea, EBko legediaren, finantzaketaren eta energia biltegiratzeko proiektuen bidez.
Era berean, irabazi-asmorik gabeko nazioarteko elkarte honek Europako eta munduko deskarbonizazioan aurrera egin nahi du, energia biltegiratzeko soluzioen bidez, fluxu-baterien teknologian eta eraginkortasun- eta segurtasun-ezaugarrietan oinarrituta.
Une honetan, Flow Batteries Europe 5 ikerketa-zentrok (CIC energiGUNE, Tekniker, CENELEST, Paduako Unibertsitatea, ZHAW), 5 industria-enpresak (CellCube, InEnergy, Largo Clean Energy, Voith, W.L. Gore eta elkartuak) 5 start-upek (JenaBatteries, KEMIWATT, Pinflow Energy Storage, Vanevo, Volterion), eta elkarte batek (Vanitec) osatzen dute. Hala ere, erakundeak dei egin nahi izan die fluxu-baterien teknologiak era aktiboan sustatzeko interesa duten Europako erakunde industrial eta instituzional guztiei, Flow Batteries Europen sar daitezen, Europako klima-helburuak eta deskarbonizazioa lortzeko apustuaren barruan.