Desbiderapen geometrikoen egiaztapen eta konpentsazio bolumetrikoa laser teknologia bitartez, akats geometrikoak
06-05-2016
IK4-TEKNIKER zentro teknologikoak makina-erreminten eta koordenatu bidez neurtzeko makinen egiaztapen eta konpentsazio bolumetrikoaren zerbitzua erakutsiko du Makina Erremintaren Nazioarteko Biurtekoan.
IK4-TEKNIKER zentro teknologiko euskaldunak makina-erreminten (MH) eta koordenatu bidez neurtzeko makinen (MMC) egiaztapen eta konpentsazio bolumetrikoaren zerbitzua erakutsiko du Makina Erremintaren Nazioarteko Biurtekoan. Maiatzaren 30etik ekainaren 4ra bitartean egingo da aipatutako azoka, Bilbao Exhibition Centre-en (BEC).
Zerbitzu honek laser interferometria erabiltzen du, zehazki laser tracer eta laser tracker teknologiak, eta MMC eta MH makina handien (3, 4 edo/eta 5 ardatzeko makinak, metro batetik aurrerakoak) desbiderapena ezagutzeko eta bolumetrikoki neurtzeko.
MH eta MMCek gaizki fabrikatutako makinaren osagaiek, pieza funtzionalen higadurek (lasaierak), erregelek gaizki egindako irakurketek, eta egituraren deformazio elastikoek eragiten dituzten berezko desbiderapenak dituzte. Zehaztugabetasun geometriko horiek makinaren pozizionamenduaren eta orientazioaren doitasunean eragina dute. Hori dela eta, oso garrantzitsua da desbiderapen geometrikoak neurtu eta zuzentzea, mota horretako sistemen fabrikazio eta neurketa ahalmenak optimizatzeko.
Historikoki, makinaren errore geometrikoak ardatz guztietan modu independentean ezaugarritzeko aukera ematen duten neurketa teknikak erabili dira. Baina, metodo horiek makinaren egiaztapen-denborak luzatzen dituzte, eta, gainera, beti ez dira behar bezala egokitzen gaur egungo egiaztapen premietara, eta mugak dituzte makinen errore bolumetrikoak zehazteko, makinen dimentsioengatik, batez ere.
Gaur egun merkatua aldatu da, esaterako, dimentsio handiagoko piezak, fabrikazio-perdoi estuagoak eta prestazio, maila eta zehaztasun handiagoko makinak fabrikatzen dira. Hori dela eta, egiaztapen eta konpentsazio bolumetriko berriak eta jarduera horiek burutzeko prozedura egokiak behar dira.
IK4-TEKNIKERek eskaintzen duen zerbitzuak bi urte martxan egon ostean emaitza onak izan ditu. Zerbitzu honek makina-erreminten edo koordenatuen bidez neurtzeko makinen posizionamendu-sistema automatikoen posizio eta orientazio espaziala hainbat distantzia irakurriz bakarrik neurtzeko eta zuzentzeko aukera ematen du.