ESAk Teknikerren proiektu bat sartu du 2022ko lorpen nagusien artean

Europako Espazio Agentziak (ESA) urtero jasotzen ditu ´ESA highlights 2022´ txostenean bere lorpen nagusietako batzuk. 2022an, Tekniker buru duen proiektu bat sartu du. HISRU proiektua da, eta horren helburua Marteko ingurumen-baldintzak aprobetxa ditzakeen lehenengo erreaktorea garatzea da metanoa ekoizteko eta suzirietarako erregai moduan erabiltzeko.

Agentziak espazio-sektoreko eremu guztietan egiten dituen jarduerak erakusten ditu argitalpenak, espazioko argazkiak eta infografiak erabiliz.

Kantabriako Unibertsitatea ere parte hartzen ari da HISRU proiektuan. ESAk otsailetik apirilera bitartean finantzatutako ekimenen artean dago proiektua. Hain zuzen ere, Marte esploratzeko etorkizuneko misioetako taldeentzako baliagarri izan daitezkeen teknologia berritzaileen atalean.

Ekimen horri eskainitako tartean, Borja Pozo Teknikerreko sektore espazialeko koordinatzaileak erreaktorearen prototipoaren garapena azaltzen du. Sistemak astronautek etxeko lanetan sortutako ur grisak (gehi karbono dioxidoa) eguzki-argia erabiliz metano bihurtzen ditu. Metanoa, forma likidoan, suzirientzako erregai ahaltsua da.

Erreaktorearen prototipoa garatu ondoren, taldearen helburua eraginkortasuna nabarmen hobetzea da. Gaur egun, konpentsazio-garapenetan eta sistemaren optimizaziorik gabe, sistemaren % 6,55eko efizientzia eta metano-ekoizpenaren % 46,7ko efizientzia lortzen ari da, "sistema mota horretarako teknikaren egungo egoera gaindituz", adierazi du ikertzaileak.

Prototipo bat lantzen ari da, eta Marteko hauts simulatuarekin nola funtzionatuko duen ere probatuko du, "planetako atmosferan oso ugaria baita".

Hona hemen txostenerako sarbidea formatu interaktiboan (29. orrialdea) nahiz PDFan (44. orrialdea).