IK4-TEKNIKERek parte hartuko du EUSPEN biltzarrean, lau ponentzia teknikorekin
31-05-2019
Zentro teknologikoak parte hartuko biltzarrean, prozesuan den metrologiaren aplikazioei, zehaztasuneko ingeniaritzari, metrologiari eta trazabilitateri buruzko lau ponentziarekin.
IK4-TEKNIKERek presentzia nabarmena edukiko du nazioarteko EUSPEN biltzarraren bederatzigarren edizioan (9th International Conference & Exhibition), zeina ekainaren 3tik 7ra bitartean egingo den Bilboko Euskalduna jauregian.
Zentro teknologikoak, bada, bere eskarmentua erantsiko du, prozesuan den metrologiaren aplikazioei, zehaztasuneko ingeniaritzari, metrologiari eta trazabilitateri buruzko lau ponentziarekin.
Hala, Gorka Kortaberria IK4-TEKNIKEReko ikertzaileak neurketa-kapazitateak balio erantsi handiko fabrikazio-prozesuetan (mekanizazioa, fabrikazio gehigarria, laserra) integratzeak dakartzan premiak eta erronkak aurkeztuko ditu. Horretarako, "Industrial in-process manufacturing metrology" izeneko 1. workshop-ean hartuko du parte ekainaren 3an, 12:00etatik aurrera, eta IK4-TEKNIKERek askotariko makinetan eta prozesuetan neurketa-irtenbideak integratzeko duen eskarmentua (integrated metrology) nabarmenduko du. Arrakastadun kasuekin, hainbat gai ukituko dira; hala nola, ekoizpen-bitartekoetan integratutako neurketa-funtzionaltasun berriak (smart functionalities), kota kritikoen neurketa eta fabrikazioan zeharreko prozesu-doikuntza (baita deriben detekzioa eta zuzenketa ere), eta kalitatea kontrolatzeko nahiz, beharrezkoa bada, ekintza zuzentzaileak edo prebentziozkoak ezartzeko ikuspen-irtenbideak.
Zehaztasuneko ingeniaritzaren esparruan, akoplamendu elastikoetan zurruntasunak konpentsatzeko sistema baten garapena erakutsiko du Aitor Olarra ikertzaileak, zeina Fagor Aotek enpresarako garatu den bankada batean aplikaturik dagoen (doitasun handiko kalibrazio angeluarra dauka bankada horrek). Bankada hori tresna giltzarria da Fagor enpresak fabrikatzen dituen doitasun handiagoko kodegailu angeluarren jokaera aztertu eta hobetzeko. Ponentzia hori ekainaren 4an aurkeztuko da, 12:25etik aurrera.
Eneko Gomez-Acedo ikertzailea, berriz, eguzki-kontzentrazioko teknologiaren kontzeptu berri batez mintzatuko da ekainaren 5ean, 11:55etik aurrera. Bada, gaur egungo teknologiekin alderatuta, ezarpen-gastu baxuek eta efizientzia handiagoak ezaugarritzen dute kontzeptu hori, eta, horri esker, elektrizitatea ekoizteko kostua murriztuko da. Moduluka dago antolatuta, eta honako hauek bilduko ditu: eguzki-eremu erdi-Fresnel hemisferiko finko bat, tenperatura altuetan jarduten duen hargailu mugikor bat eta neurri handiko neurketa-sistema bat.
Azkenik, Unai Mutilba IK4-TEKNIKEReko inspekzio eta neurketa-koordinatzaileak ekainaren 6an hartuko du hitza, 13:00etik aurrera, eta Jarraipen Sinoptikoetarako Teleskopio Handiaren (LSST) norabidearen zehaztasuna egiaztatzeko erabiltzen den neurrirako neurketa-prozedura baten benetako garapena eta exekuzioa jorratuko ditu. Hala, zehaztasun handia eskatzen denez eta iristeko zailak diren geometriak nahiz bolumen handiak neurtu behar direnez, goi-mailako neurketa-teknologiak erabili dira (hala nola, laser tracker eta Spatial Analyzer softwarea). Ekainaren 6an aurkeztuko da ponentzia hori, 13:00etik aurrera.
IK4-TEKNIKEReko lau ikertzaileen ponentziak osatzeko, biltzarrera bertaratzen direnek bisita egingo dute zentro teknologikoaren instalazioetara, ekainaren 7an, 09:30etik aurrera.
EUSPEN 9th International Conference & Exhibition
Zehaztasuneko Ingeniaritzarako eta Nanoteknologiarako Europako Elkarteak (EUSPEN) antolatu du biltzarra, eta IK4-TEKNIKER kidea da hor. Bada, zehaztasuneko ingeniaritzari eta nanoteknologiari dagokienez, EUSPEN biltzarra foro garrantzitsuenetako bat bihurtu da Europan, eta ezagutzak, berritasun teknologikoak, benetako esperientziak, kasu praktikoak eta lantegiak partekatzen dira bertan, gai horietan dabiltzan agente guztientzat.